वीरगन्ज । कोभिड–१९को सङ्क्रमणलाई रोक्न देशव्यापी लकडाउन अवज्ञा गर्ने तीन सय ५२ जना भारतीय नागरिकलाई बुधबार पर्सा प्रहरीले वीरगन्जबाट नियन्त्रणमा लिएको छ ।
वीरगन्ज नाकाबाट भारततर्फ जाँदै गरेका पाँच महिला, ११ बालबालिका र ३ सय ३६ पुरुषलाई प्रहरीले नियन्त्रणमा लिएको हो ।
देशको विभिन्नस्थानमा रही काम गर्दै आएका भारतीय नागरिक वीरगञ्ज नाकाबाट भारततर्फ जाने क्रममा नियन्त्रणमा लिएको जिल्ला प्रहरी कार्यालय पर्साका प्रहरी नायब उपरीक्षक गौतम थापाले जानकारी दिनुभयो ।
उहाँले नियन्त्रणमा लिइएकालाई हाल वीरगन्जको आदर्शनगरस्थित ठाकुरराम बहुमुखी कम्यापसको एजुकेशन भवनमा राखिएको बताउनुभयो । काठमाडौँ, चितवन, मकवानपुर, पोखरालगायतका स्थानमा रही काम गर्दै आएका भारतीय नागरिक मालवाहक वाहनमा लुकिछिपी तथा पैदल यात्रा गर्दै वीरगन्जसम्म आइपुगेको प्रहरीले जनाएको छ ।
मंगलबारदेखि नै प्रहरी नियन्त्रणमा रहेकालाई आदर्शनगर ग्रीन सिटी सामुदायिक सेवा केन्द्रले खानाको प्रबन्ध गरेको छ ।उनीहरुलाइ क्वारेनटाइनमा राख्ने बिषयमा छलफल भइरहेको पर्सा प्रहरीले जनाएको छ ।