भद्रपुर । झापाको कमल गाउँपालिका ५ पाडाजुँगीस्थित आशिष बस्नेतको घरबाट ११ जना जुवाडेलाई प्रहरीले पक्राउ गरेको छ । इलाका प्रहरी कार्यालय दमकका अनुसार गएराती साढे ११ बजे बस्नेतको घरको एक बन्द कोठाबाट सिलबन्दी अवस्थाको ३ बुक र ५२ पत्ती तास खेलिरहेको अवस्थामा पक्राउ गरिएको जिल्ला प्रहरी कार्यालय झापाले जनाएको छ ।
पक्राउ पर्नेहरुमा घर धनी २५ बर्षिय आशिष बस्नेत, कमल गाउँपालिका ४ का ३० बर्षिय खेम तिवारी, सोही ठाउँका ३१ बर्षिय जीवन लिम्बू , ५ का २४ बर्षिय रेवत भुजेल, ४१ बर्षिय डम्बर बुढाथोकी, २५ बर्षिय राहुल चौधरी, ३७ बर्षिय चित्र बहादुर राई, ३६ बर्षिय धन बहादुर राई, ३३ बर्षिय सन्तोष राई, ४२ बर्षिय विमल मेचे, कमल ३ का ३३ बर्षिय युके सुब्बा रहेका छन् । जुवाको खालबाट नगद ९५ हजार रुपैयाँ बरामद गरिएको इलाका डिएसपी विजयराज पण्डीतले जानकारी दिनुभयो ।
उनीहरुलाई इलाका प्रहरी कार्यालय दमकमा राखेर थप अनुसन्धान अघि बढाइएको पण्डीतले बताउँनुभयो ।पक्राउ परेका सबैमाथि जुवा ऐन अन्तर्गत मुद्दा दर्ता गरी कानुनी कारबाही अघि बढाइने पण्डीतले जनाउनु भयो । यस अघि बिहीबार राती झापाको गौरादह ९ बैगुनधुराबाट जुवा खेलिरहेको अवस्थामा स्थानीय अमर माविका प्रअ गोपाल पोखरेल, लेखनाथ आविका राम बहादुर ढुंगाना, नेकपाका स्थानीय नेता नेत्र पोखरेल लगायत ८ जनालाई कौडा र नगद ९१ हजार रुपैयाँसहित इलाका प्रहरी कार्यालय झिलझिलेले पक्राउ गरेको थियो । उनीहरुलाई दमक राखिएको भएपनि इलाका प्रहरी कार्यालय झिलझिलेको क्षेत्र भित्र सो खेल भएको र पक्राउ पनि सोहि इलाकाले गरेको हुँदा थप कानुनी कारबाहीको प्रक्रिया अघि बढाउन झिलझिले इलाका प्रहरी कार्यालय पठाइएको उहाँको भनाइ छ ।